Poslovne vesti - Makedonija

Бугарски "Филкаб" инвестира 3,5 милиони евра во фабрика за електроматеријали во Визбегово

Бугарската компанија "Филкаб" ќе инвестира 3,5 милиони евра во фабрика за производство на електроматеријали.

Странскиот инвеститор во производниот погон во скопско Визбегово планира да отвори 100 нови работни места. Одлуката за инвестицијата ја објавија министерот за странски инвестиции, Џери Наумоф и менаџментот на компанијата која веќе е присутна на македонскиот пазар 10 години.

Објектот на компанијата ќе се простира на 10 илјади метри квадратни во Визбегово, општина Бутел и ќе произведува трафостаници за пренос на електрична енергија. Производството е наменето за домашниот пазар.

- Инвестицијата во Македонија претставува знак за доверба во нашата економија и политиката на Владата - изјави Наумоф.

Тој додаде дека првиот контакт почна пред една година и дека со напорна работа во последните пет месеци и со поддршка од премиерот се најдоа соодветни решенија за овој проект да стане реалност.

- Оваа инвестиција ќе биде голем економски поттик за областа на Скопје од причина што ќе обезбеди повеќе од 50 работни места во почетната фаза и можност за повеќе од 100 нови работни места кога инвестицијата ќе работи со полн капацитет. Исто така, овој проект ќе биде од корист и за локалните македонски компании кои ќе ги изведуваат градежните работи - изјави Наумоф.

Изрази надеж дека оваа успешна приказна ќе биде дополнителен поттик и за други бугарски компании кои сакаат да се прошират на регионалниот пазар и пошироко.

Најави дека во моментов работи со неколку други бугарски компании од земјоделскиот сектор и минерални суровини кои сакаат да инвестираат во земјава.

Компанијата "Филкаб" со оваа инвестиција сака да ја зајакне својата позиција на регионалниот пазар и пошироко.

- Главниот мотивирачки фактор за компанијата била желбата присутна во државната политика за подобрување на бизнис-климата и привлекување странски инвестиции. Ова го велат затоа што пред околу 10 години на почетокот на нашата работа во Македонија се соочивме со голем број тешкотии при реализацијата на нашите планови - истакна Миле Шаоски, претставник на Филкаб".

Досега инвестирале околу еден милион евра во имот, проекти и складишни објекти.

- Веруваме дека со решението да создадеме сопствен производен и логистички капацитет во Македонија ќе успееме да ја зајакнеме својата позиција не само на локалниот пазар, туку овој капацитет ќе биде основен логистички центар од кој ќе се снабдуваат сите пазари од регионот на Западен Балкан - рече Шаоски.

Никола Аврамов, претставник од бугарскиот "Филкаб", смета дека има разлика во условите за работа од пред десет години и оти таа е очигледна.

Компанијата во Бугарија има 15-годишна историја. Почна со трговија, потоа производство на различни технички линии и производи. Работи во повеќе земји надвор од Бугарија како Романија, Грција, Кипар, Германија, Албанија и Косово и намерата е да развијат слична дејност и во Македонија.